کراچی 29مئی 2024: ہچی سن پورٹس پاکستان نے ملکی تاریخ کے اب تک کے سب سے بڑے کنٹینر بردار بحری جہاز CV MSC ANNAکو خوش آمدید کہتے ہوئے پاکستان کی پورٹس اینڈ شپنگ انڈسٹری کی تاریخ میں ایک نیا باب رقم کردیا ہے۔ یہ سنگ میل ٹرمینل کی جدید صلاحیتوں اور خطے میں اسٹریٹیجک اہمیت کو اجاگر کرتا ہے۔
کنٹینر بردار بحری جہاز CV MSC ANNA دنیا کے سب سے بڑے بحری جہازوں میں سے ایک ہے جس کی لمبائی 400میٹر ہے۔ اتنے بڑے بحری جہاز کی موثر طریقے سے ہینڈلنگ ہچی سن پورٹس کے بہترین آپریشنز کی ایک مثال ہے۔ ملک کے واحد گہرے پانی کے کنٹینر ٹرمینل کی حیثیت سے ہچی سن پورٹس پاکستان جدید ٹیکنالوجی اور انفرااسٹرکچر سے لیس ہے جو بہت بڑے کنٹینر بردار بحری جہازوں کی بے مثال منجمنٹ کو یقینی بناتے ہیں۔
اس اہم سنگ میل کے موقع پر اپنے تاثرات میں ہیڈ آف بزنس یونٹ ہچی سن پورٹس پاکستان سی ایس کم نے کہا کہ پاکستان کی تاریخ کے سب سے بڑے کنٹینر بردار بحری جہاز کی ہینڈلنگ ہچی سن پورٹس پاکستان کے لیے باعث فخر ہے اور پاکستان کی میری ٹائم انڈسٹری کی ترقی کے لیے ہمارے عزم کی ترجمانی کرتی ہے۔
سی ایس کم نے کہا کہ ہم باقاعدگی سے بڑے بحری جہاز ہینڈل کررہے ہیں۔ اس سے قبل 14ہزار ٹی ای یوز کے حامل 366میٹر طویل بحری جہاز کی ہینڈلنگ کی گئی تھی اور اب CV MSC ANNA کو ہینڈل کیا گیا جس کی گنجائش 19ہزار 368 ٹی ای یوز ہے اور لمبائی 400میٹر ہے۔ مستقبل میں بھی ہم بڑے بحری جہازوں کی موثر طریقے سے ہینڈلنگ کی اپنی صلاحیت کا مظاہرہ کرتے رہیں گے۔
ان بڑے بحری جہازوں کی آمد سے فریٹ چارجز کو کم کرنے میں مدد ملے گی جو اداروں اور صارفین دونوں کے لیے فائدہ مند ہے۔ اس طرح کے بڑے بحری جہازوں کی ہینڈلنگ سے پورٹ کی سرگرمیوں اور تجارت میں اضافے سے حکومتی ریونیو میں بھی نمایاں اضافہ ہوگا۔ بڑے بحری جہازوں کی آمدورفت میں اضافہ عالمی تجارت میں پاکستان کے مقام کو بڑھانے کے ساتھ ملک کی معاشی ترقی میں بھی اس ٹرمینل کی اہمیت کو اجاگر کرتا ہے۔